Қос диплом – екі есе мүмкіндік

Қостанай қызмет көрсету саласының колледжінде жұмысшы біліктілігі бойынша эксперименттік білім беру бағдарламасы аясында колледжді тәмамдаған 10–11-сыныптардың білім алушыларына диплом табыстау салтанаты өтті.

Оқушылардың жалпы білім беретін мектепті бітіру аттестатына керемет қосымша болатын дипломды колледждің директоры Дина Жанарстанова өз қолымен табыстады. Айтуынша, ҚР Оқу-ағарту министрлігінің мұрындық болуымен қолға алынған эксперименттік білім беру бағдарламасының нәтижесі көңіл қуантады. Өйткені, жастар қысқа мерзім ішінде мектеп аттестатымен қатар, өмірде міндетті түрде қажет болатын жақсы мамандықты да меңгеріп шығады. Бұл – олардың негізгі кәсібі болмаса да, әрдайым жақсы табыс табуға мүмкіндік беретін «қосымша тірек» болмақ.

– Эксперименттік бағдарлама былтыр басталды. Бүкіл Қостанай облысы бойынша 34 колледждің ішінен тек 2 колледж ғана осы бағдарламаға енді. Оның бірі – біздің колледж, екіншісі – Кәмшат Дөненбаева атындағы кәсіптік-техникалық колледж. Биыл бізге 11 оқушы қабылданып, міне, дипломдарын алды. Олардың алтауы – қызыл диплом иегері атанғанын ерекше атап өтуге болады. Бұл да оқушылардың ынта-жігерімен оқығанының дәлелі болса керек, – дейді колледждің білім меңгерушісі Құмырай Тоғыбаева.

Оқушылар жалпы білім беретін пәндерді мектепте меңгергендіктен, колледжде тек кәсіби модульдер мен эксперименттік бағдарлама бойынша білім алды. Биыл колледж бағдарлама аясында екінші толқын оқушыларын қабылдап үлгерді. Қазіргі уақытта базада 16 студент тіркелген. Бірінші корпуста олар тігіншіліктің қыр-сырын үйренсе, екінші корпуста аспаз мамандығын меңгермек.

Гулим БАТЫР,
Адилет НУРАБАЕВ