Ұлттық ойындардан жарыс

Н.Құлжанова атындағы Торғай гуманитарлық колледжінде Ахмет Байтұрсынұлының 150 жылдығы және Наурыз мейрамына орай «Бір шаңырақ астында» атты колледж оқытушылары мен қызметкерлері арасында ұлттық ойындардан жарыс өтті.

Қазақтың ұлттық ойындарының қоғамдық және әлеуметтік маңызы зор. Ұлттық ойындар атадан балаға, үлкеннен кішіге мұра болып, ұрпақтан-ұрпаққа жалғасып келеді. Ата-бабаларымыз ұлттық ойындар арқылы ұрпақтың мықты әрі жігерлі болып өсуіне ықпал етіп, олардың береке-бірлігі мен ынтымағын жарастырып отырған. Расымен де, халықты ұлты мен жеріне, тілі мен дініне бөлмей, өзіне ынтызар етер спорттың құдіреті жоғары.

«Спорт – денсаулық кепілі» екені бәрімізге мәлім. Ұлттық құндылықтарымыз насихатталған жарыстың салтанатты ашылу рәсімінде шашу шашылып, наурыз көже және ыстық бауырсақ таратылып, қатысушыларға керемет көңіл-күй сыйлады. Ұмыт қалған ұлттық ойындарды насихаттау және достық қарым-қатынасты бекіту мақсатында өткізілген жарыс, тоғыз ұлттық ойын түрін құрады. Жарыста пәндік әдістемелік бірлестіктері және әкімшілік командасынан құрылған жалпы 28 сайыскер бақ сынады.

Тартысты жарыстың қорытындысы бойынша 1-орынды гуманитарлық бірлестік командасы иеленсе, 2-орынға жаратылыстану бірлестігі ие болды. Ал жүлделі 3-тұғырға әкімшілік командасы тұрақтаса, 4-орынды саз бөлімінің командасы иеленді. Марапаттау сәтінде колледж басшысы Сандуғаш Алматова жеңімпаздарды құттықтап, қатысушыларға алғысын білдірді. Сайысқа қатысушы жеңімпаздарға кәсіподақ қаржылай демеушілік жасап, мадақтама қағаздарымен марапаттады. Осындай бағытағы бірлескен іс-шаралар ұжымды бір арнаға бағыттап, олардың берекесі мен бірлігін бекем етері анық.

Ниязбек ОРАЗОВ,
Н.Құлжанова атындағы
Торғай гуманитарлық колледжі
Жастар ісі жөніндегі
комитетінің төрағасы,
Арқалық қаласы