Жүлдемен оралған жалынды жастар

Зерек колледжінің ұйымдастыруымен Қостанай облысының Техникалық және кәсіптік, орта білімнен кейінгі білім беру ұйымдарының студенттері арасында «Облыстық еріктілер форумы-2023» байқауы өткізілді.

Қазақстандағы Алғыс айту күніне және Мемлекеттік рәміздердің 30 жылдығына арналған форумға Арқалық қаласының намысын қорғап, Н.Құлжанова атындағы Торғай гуманитарлық колледжінің «Нағыз көшбасшылар одағы» еріктілер ұйымы бақ сынап, тартысты додада өздерін жан-жақты қырларынан көрсете білді. Форум Қостанай облысының колледждерінде еріктілер қозғалысын насихаттау және дамыту мақсатын көздеген болатын.

Еріктілер форумына 6 бағыт бойынша 22 колледжден 100-ге тарта ерікті жастар қатысты. Байқау қатысушыларына әділ бағасын беріп, төрелігін көрсеткен қазылар алқасының құрамында педагог-ұйымдастырушы, Қазақстан халқы Ассамблеясы жанындағы волонтёрлер орталығының төрайымы Пушкарева Анастасия Вячеславовна, Қостанай облысының ресурстық орталығының волонтерлар секторының меңгерушісі Манарбекова Малика Манарбекқызы және «Социум&Я» қоғамдық бірлестігінің төрағасы Анненков Егор Анатольевич болды.

Осылайша тартысты өткен облыстық еріктілер форумында Арқалық қаласының намысын қорғаған Н.Құлжанова атындағы Торғай гуманитарлық колледжі «Үздік еріктілер күнделігі» бағыты бойынша, «Жастар бастамалары» номинациясында жүлделі I орынды иеленді. Жыл сайын бұл бастама жалғасып тауып, өрендердің қатары толыға берсін дегім келеді. Біздің қазақта «ақыл – жастан, асыл – тастан», «жас келсе – іске» деген нақыл сөздер бар. Бұл да ата-бабаларымыздың қай кезде де жас ұрпаққа үлкен үміт артып, олардың болашағына сеніммен қарағанын көрсетеді. Бұл қай кезде де өзекті болып қала бермек. Біліммен қаруланған, бәсекеге қабілетті жастарға артар сеніміміз мол!

Ниязбек ОРАЗОВ,
Н.Құлжанова атындағы
Торғай гуманитарлық колледжі
Жастар ісі жөніндегі
комитетінің төрағасы,
Арқалық қаласы