Абай мұрасы – ұрпаққа аманат

Жақында Рудный қаласындағы Мемлекеттік тілдегі кітапхана мен қалалық орталықтандырылған кітапхананың ұйымдастыруымен ғұлама ғалым, ойшыл, ақын Абай Құнанбайұлының 180 жылдығына орай «Сөз патшасы – ұлы Абай» атты әдеби-ғылыми конференция өтті.

Іс-шара барысында халықаралық ынтымақтастық аясында Ресей Федерациясының Новосібір қаласындағы М.И. Цветаева атындағы кітапханамен онлайн байланыс жасалды. Конференцияға Ақсақалдар кеңесінің төрағасы, ақын, қара сөз қаламгері Жаңбыршы Тұқатұлы Тілеуқабылов, еңбек ардагері, ақын Қадырхан Ауезханұлы Қожанов, сондай-ақ қазақ тілі мен әдебиеті пәнінің мұғалімдері Динара Сыздықова, Эльмира Қасқырбаева, Д.М. Карбышев атындағы №14 мектептің оқушылары мен қала кітапханашылары қатысты.
Баяндамашылар ұлы Абай шығармаларының ұлттық құндылығы, олардың танымдық маңызы, ұлттық әдебиет пен мәдениеттің, ана тілінің дамуына қосқан үлесі туралы сөз қозғады. Абайдың қара сөздері – сыншылдық пен ойшылдыққа негізделген, көбінесе адамгершілік мәселелеріне арналған өсиет деуге болады. Олардың түйіні – адам болуға негізделеді. Сонымен қатар, ресейлік әріптестер ойшылдың шығармашылығын шетелде насихаттау және оның әлемдік маңызы жөнінде пікір білдірді.
Алқалы жиын барысында оқушылар Абай өлеңдері мен қара сөздерінен үзінділер оқып, әнші Шәмшия Қайыркенова ақынның «Көзімнің қарасы» және «Қараңғы түнде тау қалғып» әндерін нақышына келтіріп орындады. Жас ұрпақ үшін Абайдың өсиеттері мен өлеңі асыл қазына. Абай мұрасы – ұлттың бірігуіне, елдің дамуына жол ашатын қастерлі құндылық.

Гүлбараш УАЛИЕВА,
Мемлекеттік тілдегі
кітапхананың меңгерушісі,
Рудный қаласы