Театр тарланы – Қапан Бадыров

Ыбырай Алтынсарин мемориалдық музейінде Қазақстанның халық әртісі, ҚР Мемлекеттік сыйлығының лауреаты Қапан Бадыровтың туғанына 120 жыл толуына арналған «Театр тарланы» атты көрме өтті.

Көрмеде Қазақстан темір жолының және мәдениет қызметкерлері Қ.Бадыровтың өмірі мен қызметі жайлы тың ақпараттар алып, шығармашылығымен танысты. Қапан Бадыров – театр сахнасында көптеген бірегей образ сомдаған. Әсіресе, Науан хазірет пен Отелло бейнелері – Бадыровтың қазақ сахна өнерін дамытуға қосқан елеулі үлесі болды. Кейінірек У.Шекспирдің «Асауға-тұсауындағы» Баптиста, М.Әуезовтің «Еңлік-Кебегіндегі» Абыз бейнелері сияқты қарама-қайшы кейіпкерлерді сахналауы оның жан-жақты дарынын танытты. Сондай-ақ, актер «Амангелді», «Абай әндері», «Алып туралы аңыз», «Өмір жолы» және тағы басқа фильмдерге түскен.

Көрменің ашылу салтанатына арнайы қатысқан Қапан Бадыровтың аталас туысы Бадыров Орынтай Ғалымұлы актер жайында естеліктерімен бөлісіп, әңгіме өрбітті. Орынтай Ғалымұлы Қапан Бадыровты 5-сыныпта оқып жүрген шағында әкесімен Алматыға барған сапарында алғаш рет көргенін айтады. Сол кезде актер ағасымен танысып, спектаклін көруге театрға барып, үлкен әсер алып қайтқан. Кезінде Қапан Бадыров өзінің киіп жүрген шапанын Орынтай Ғалымұлына берген екен. Ал, енді, дәл сол шапаны біздің Ы.Алтысариннің мемориалдық музейнің қорына табысталды. Кеш қонағының айтуынша, Қапан Бадыровтың өлең шығаратын қыры да болған. Орынтай Ғалымұлы, сондай-ақ, Қ.Бадыровтың Ахмет Байтұрсыновқа арнап шығарған өлеңінің қолжазбасын біздің музей қорына сыйға тартты.
Кеш барысында Ы.Алтынсарин атындағы мамандандырылған мектеп-гимназия-интернатының оқушылары Тоқжан Жахиннің «Дала рухы» күйін орындады. Осылайша, тағылымға толы жиын соңында Қ.Бадыровтың фильмдерінен үзінді көрсетілді.

Назгүл ШЕКТЫБАЕВА,
ЫАлтынсариннің
мемориалдық музейінің
бас қор сақтаушысы,
Қостанай қаласы