Жас таланттар топ жарды

Жылдағы дәстүрге сай «Біз таланттарды іздейміз» шығармашылық жобасының финалы өтіп, оған вокалдық және хореографиялық номинациялар бойынша 22 жеке орындаушы мен топ қатысты. Байқаудың іріктеу кезеңіне 48 бала өтініш білдірген.

Жобаның негізгі мақсаты – жас талантты орындаушыларды іздеу, дамыту және қолдау, озық дәстүрлерді жаңғырту, жас өнерпаздардың көркемдік талғамын тәрбиелеу, өскелең ұрпақтың патриоттық сезімін ояту, балалар мен жастарға арналған үздік ән мен биді насихаттау, жаңа ақпараттық деңгейге шығу. Шығармашылық байқауда балалардың өнеріне мектеп мұғалімдері мен ата-аналар қауымы төрелігін жүргізді.

Бағалау барысында өнерпаздардың орындау техникасы мен деңгейі назарға алынып, сахналық және көркемдік бейне, әртістік, пластикалық және синхрондылыққа аса мән берілді. Байқау қорытындысы бойынша Гран-приді 6 «Ә» сынып оқушыларының «Құрбылар» дуэті «Вокалдық топтар» номинациясы бойынша, «Жеке вокал» номинациясы бойынша Ясмин Ибраева иеленді. «Хореографиялық топтар» номинациясы бойынша 5 «Ә» сыныбының «Улыбка» тобы, «Жеке хореография» номинациясын Айдан Урманов алды.

Қатысушылардың дайындығы жоғары деңгейде болып, барлық балаларға өз номинациялары бойынша мадақтамалар табысталды. Қатысушыларымызға қол жеткізген жетістіктермен тоқтап қалмай, алдағы уақытта да шығармашылық жолда дами беруіне тілектеспіз.

Алмагүл ЖАҢАБАЕВА,
№13 ЖББ мектебі директордың тәрбие ісі жөніндегі орынбасары,
Рудный қаласы