Жастардың шығармашылық алаңы

Қостанайдағы А.Байтұрсынұлы ескерткішінің жанында «Қостанай Арбаты» ұйымдастырды. Мұнда жас дарындардың әртүрлі қолөнер бұйымдары қойылып, шығармашылығымен бөлісіп, өнер көрсетемін деушілерге арнайы алаң ұсынылды.

«Жастар рухы» ЖҚ Қостанай облыстық филиалының тікелей өкілі Дильназ Бисенова бұл іс-шара Қостанай облыстық жастар ресурстық орталығымен бірлестікте мемлекеттік тапсырыс бойынша жастарға арналған бос уақытты дамыту жобасы аясында ұйымдастырылғанын айтты.

– Жаз айларында жастарға қызықты форматта іс-шаралар өткізіп тұрамыз. Олардың қатарында караоке кештері, арбат, спорттық жарыстар, көше билері де бар. Бүгінгі «Қостанай Арбатында» 15 қатысушы өздерінің жұмыстарын көрсетіп, сату мүмкіндігіне ие болды. Сонымен қатар, шағын концерттік бағдарлама да жиналғандарға көтеріңкі көңіл-күй сыйлады. Кез келген адам жақындап, ән, би немесе басқа да өнерлерін көрсете алды. Басты мақсатымыз – шығармашылық жастарға өздерін көрсетуге мүмкіндік беру және олар үшін осындай жобалардың бар екенін таныту, – дейді Дильназ Қайратқызы.
Жәрмеңкеге қазақ әшекейлерін әкелген Ақерке Дәулетқызы өзінің бұл жұмысын екі жарым ай бұрын бастағанын айтады. Ол ұлттық нақыштағы бұйымдарды дәріптеуге ден қойған. «Адамдар ұлттық бұйымдарды тек Наурыз мерекесінде ғана тағу керек деп ойлайды. Бірақ, жоқ. Күнделікті өмірде де киім үлгілерін ұлттық бұйымдармен үйлестіріп киюге болады», – дейді қолөнер шебері. Сатуға шығарған бұйымдардың ішінде шашбау, сырға, түйреуіш, сақина, шекелік сынды басқа да әшекейлерді көзіміз шалды.

Алты жасар баласы Ильямен бірге келген анасы Екатерина болса эпоксидті смоладан сағат, орындық, тақтайша, шам, ойыншық, тіпті ыдыс-аяқты да жасайды екен. Айтуынша, баласының қолөнерге қызығушылығын дамыту мақсатында осы іспен айналыса бастаған. Нәтижесі бар. Қазіргі таңда баласының ой-пікірлерімен санасып, оның идеясы негізінде әртүрлі туындыларды бірлесе жасап, шеберлік сағаттарын да өткізіп тұрады.
Қатысушы жастардың тағы бірі – Никита. Теріден бұйым жасаумен әуестенгеніне небәрі екі ай болған. «Бұл өнер түрі – мен үшін таңсық әрі қызықты тәжірибе болды. Теріден түрлі дүниелер жасап, олардың сапасы мен дизайнын жақсартуға тырысудамын. Бүгінде белдік, әмиян, сөмке сияқты бұйымдарды жасауды үйрендім. Мақсатым – ұлттық нақышта әдемі әрі сапалы өнімдер ұсыну және бұл бағытта тері өңдеудегі шеберлігімді арттыру», – дейді ол.

Ұйымдастырылған шағын концерттік бағдарламада әр шығармашыл жастың өнерін көрермен қошеметпен қарсы алып, кешке ерекше сән берді. Бұл – жас дарындардың өзіндік қолтаңбасын қалыптастырып, көпшілікке танылуына мүмкіндік берген маңызды жиын болғаны рас. Қаламызда жастардың шығармашылығын қолдау мен дамытуға бағытталған осындай бастамалар жиі өткізіліп тұратыны қуантады.

Ділназ САНТАЙҚЫЗЫ,
суретті түсірген
Алан КУСАИНОВ