«Жемчужина» ансамбліне 30 жыл!

Осыдан тура 30 жыл бұрын, яғни 1994 жылы мамардың 15-і күні «Жемчужина» фольклорлық хореографиялық ансамблі құрылды. Ал, 2010 жылы «Халық» құрметті атағы берілген ансамбльдің тұрақты жетекшісі – Татьяна Константиновна Трокоз.

Ансамбльдің репертуары да сан алуан, оның құрамында көптеген әлем халықтарының билері бар: «Маусымжан», «Мерекелік күй», «Жалынды Молдовеняска» мен «Украин хопағы», орыс, татар, өзбек биі мен белорус билерін тамашалауға болады. Билердің қай қайсысы болмасын, мазмұны мен дизайны жағынан әртүрлі, алайда әр халықтың көркем шығармашылығына тән белгілермен біріктірілген: өмірдің қуанышы, жарқын оптимизм, сезімдердің шынайылығы және қарапайымдылығы, ұлттық нақыштың сақталуы – бұның бәрі әр халықтың мәдениетіне тән.

Бүгінде «Жемчужина» фольклорлық хореографиялық ансамблі көптеген қалалық, облыстық іс-шаралардың тұрақты қатысушысы, қалалық, облыстық, республикалық және халықаралық байқаулардың лауреаты. Мерейлі 30 жылдығына орай, Рудный қаласындағы Абай атындағы мектеп ұжымы «Жемчужина» фольклорлық хореографиялық ансамблінің мүшелеріне қажымас қайрат, алынбаған белестерді бағындыруды тілейді. Біз сіздерді мақтан тұтамыз!
 

Гүлзада ШАЙМАРДАНҚЫЗЫ,
Абай атындағы мектептің
қазақ тілі мен әдебиеті
пәнінің мұғалімі,
Рудный қаласы