Әдістемелік қызметті жаңғырту

Қазіргі заманның сұранысына жауап беру үшін әдіскер қандай болуы керек? Осы сұрақтың жауабын біз «Өрлеу» Біліктілік арттыру ұлттық орталығы ұйымдастырған екі апталық курста іздедік.
Қазіргі таңда білім беру жүйесіндегі жаңғыру мен цифрландыру әдістемелік қызметке де жаңа серпін беріп отыр. Осы бағытта облысымыздағы білім бөлімдерінің әдіскерлері үшін «Өрлеу» БАҰО ұйымдастырған «Әдістемелік қызметті трансформациялау» атты екі апталық курс ерекше маңызға ие болды. Аталған курс теориялық білім ғана емес, практикалық бағыт-бағдар, кәсіби шабыт пен жаңа көзқарас сыйлады.
Курстың жетекшісі, тәжірибелі әдіскер, кафедра меңгерушісі Жүсіпова Ғалия Сапарбекқызы әдіскерлерді мұғалімдердің қызметін реттейтін маңызды нормативтік-құқықтық құжаттармен таныстырып, оларды бүгінгі талаптар тұрғысынан қарап, талдауға бағыттады. Курс барысында көптеген өзекті тақырыптар қамтылды. Соның ішінде инклюзивті білім беру, әдіскердің кәсіби миссиясы, заманауи білім беру технологияларын қолдану, перспективалық жоспар құру, сонымен қоса мектептердегі тәжірибені зерделеу, ресурстық портфолио жасау сияқты нақты жұмыстар жүзеге асты. Курс барысында біз кәсіби міндеттердің жаңаша қырынан қарастырып, әдістемелік қызметті кеңес беру жұмысы ретінде ғана емес, мектептің стратегиялық даму жолына бағыт беретін жетекшілік қызмет деп түсіндік.
Әдіскердің қазіргі рөлі – мұғалімнің сенімді серігі, кәсіби дамуына қолдау көрсетуші, білім сапасына әсер ететін негізгі тұлға екені ерекше айтылды. Ерекше атмосферада өткен курста қатысушылар тәжірибе алмасып, әріптестік қарым-қатынас орнатып, кәсіби қолдау мен өзара ынтымақтастықты нығайтты. Жобалық тапсырмалар мен топтық жұмыстар арқылы белсенділік танытып, білімімізді тереңдеттік. Екі апта ішінде жинақталған білім мен тәжірибе әр әдіскердің жұмысына тың серпін беріп, болашаққа жаңа жоспармен қарауына жол ашты. Мұндай курстар педагогикалық қауымдастықты біріктіріп қана қоймай, білім сапасын арттыруға да нақты үлес қосатыны сөзсіз.
Бұл күні әдістемелік қызметті трансформациялау – уақыт талабы. Ол тек жаңару ғана емес, білім беру жүйесінің жаңа дәуіріне аяқ басу жолындағы маңызды қадам.

Индира БЕГЕМАНОВА,
Қостанай ауданы білім
бөлімінің әдіскері