Бала тағдыры – ортақ жауапкершілік

Соңғы уақытта балалар арасында өз-өзіне қол жұмсау оқиғалары жиілеп, қоғамды алаңдатып отыр. Осы мәселені бірлесе шешу мақсатында «Өркен» институты маңызды жобаны қолға алып, ұстаздарға біліктілікті арттыру курсын ұйымдастырды.

Балалардың қауіпсіздігі – баршамызға ортақ, басты міндет. Балалар арасында жиілеп кеткен қайғылы оқиғалардың әсері назар аударады. Мұндай келеңсіз жағдайлардың алдын алу үшін қоғам болып күрес жүргізу қажет. Бұл мақсатта «Өркен» балалардың әл-ауқатын арттыру ұлттық ғылыми-практикалық институты қолға алған маңызды жоба аясында қыркүйек айының екінші онкүндігінде ұйымдастырылған қысқа мерзімді біліктілікті арттыру курсына қатыстық. Дәрісті аталған мекеменің академиялық бөлімінің аға оқытушысы Нұрмағанбетова Ғалия Ақылбекқызы жүргізді. 36 сағаттық дәрісте ата-аналармен бірлесе отырып, қауіп-қатерлерді дер кезінде анықтау мен алдын алу шаралары туралы нақты ұсынымдар берілді.

Аталмыш курс барысында баланың мінез-құлқын бақылау, әлеуметтік желілердегі белсенділік мониторингі, сондай-ақ олардың мектептегі құрдастарымен қарым-қатынасын бақылау жолдары қарастырылды. Оқушылармен тұрақты байланыс жасап, ашық диалог үшін сенімді орта құрудың және ата-аналардың баласының өміріне үнемі қатысуының маңызы ерекше атап өтілді. Осындай өзекті тақырыптар қамтылған қысқа мерзімді курс мектеп мұғалімдері үшін тиімді әрі пайдалы болды. Бала – біздің болашығымыз. Бүгінде мемлекет тарапынан оқушылардың алаңсыз білім алуына барлық жағдай жасалған. Ұстаздар өз міндетін барынша адал атқарып келеді, өз кезегінде, ата-аналардың да бала тәрбиесіне назар аударуы аса маңызды. Өйткені, балалардың қауіпсіздігі үшін бәріміз жауаптымыз.

Гүлмира ЕЛЕУСІЗОВА,
Айдарлы жалпы білім
беретін мектебінің директоры,
Қарасу ауданы