«Үндестік» жобасы және «Кәсіптер әлемі» кәсіптік бағдарлау жобасы аясында Қостанай қаласындағы №54 балабақшаның «Ботақан» тобында «Ата-аналардың жұмысында бір күн» акциясы ұйымдастырылды.
Әлемде көптеген кәсіптер бар: кейбіреулері қауіп пен тәуекелге байланысты, басқалары адамдарға көмек көрсетумен байланысты, енді біреулері маңызды шешімдер қабылдайды және басқалары бекітілген тапсырмаларды орындайды. Қандай мамандық болса да, әрбір бала ата-анасының не істейтініне қызығушылық танытатыны рас.
Балабақшамыздағы «Ботақан» тобы балаларының ата-аналары Ткаченко Тамара Сергеевна, Неверова Анастасия Ивановна, Омельченко Виктор Сергеевич, Аяшева Асемгуль Маликовна игілігі мол акцияға қуана-қуана атсалысты. Олар балаларын жұмыс орнымен таныстырды, онда атқаратын міндеттері туралы әңгімелеп, жұмыс ерекшеліктерін түсіндірді, қызметі барысында қажетті жабдықтар мен материалдарды көрсетіп өтті.
Ата-аналарының жұмысында өткізген бір күннен балалар ерекше әсерленіп, қатарлас дос-жарандарының алдында қуаныш пен мақтаныш сезімін жасырмай, білген ақпараттарымен асқан ықыласпен бөлісті. Осылайша еңбектің қадірін түсініп, бағалауға ықпал еткен акция аясында ата-аналардың жұмысы балаларға қызықты және өте маңызды іс ретінде ашылды.
Іс-шара, біріншіден, отбасы мүшелерін бір-бірімен жақындастыра түсуге септігін тигізсе, екіншіден, ата-анасының жұмыс орнында бір күнін өткізе отырып, балалар үлкен тәжірибе жинады деген ойдамыз. Шарапаты мол акцияны ұйымдастырып, қатысқаны үшін топ пен балабақша өміріне белсенді қатысатын ата-аналарға үлкен ризашылығымызды білдіреміз.
Айжан ӘЛІМБАЕВА,
№54 балабақшаның
тәрбиешісі,
Қостанай қаласы