Балабақшадағы зерттеу жұмыстары

Қостанай қаласындағы №51 бөбекжайдың «Балдырған» ортаңғы тобында зерттеу жұмыстары өткізіледі. Зерттеу барысында бала өз қажеттіліктерін қанағаттандырады, үнемі ойлауды, есте сақтауды, зейінді дамытады.

Бақылау, салыстыру, орнына қою сияқты дағдыларды да қалыптастыруға ықпал ететін зерттеу жұмыстарының маңызы зор. Сыртқы әлеммен байланысқа және өзара әрекеттесуге ұмтылыс, жаңа мәселелерді табу және шешу – адамның маңызды қасиеті. Бала дүниеге келгеннен өзін қоршаған әлемді ашушы, зерттеуші. Олар ақыл-ой жұмысын жақсы көреді. Сондықтан да болар, зерттеу жұмысы – баланы қызықтырудың жолы. Балалармен зерттеу жұмыстарын әртүрлі ұйымдастыруға болады. Өйткені, бала – қоршаған ортаны табиғи зерттеуші.

Қазіргі уақытта зерттеу жұмысы арқылы балалардың танымдық қабілеттерін дамытудың рөлі ерекше, сол арқылы бала да өзін тұлға ретінде қалыптастырады. Себебі, әр баланың өзіндік танымдық қабілеті бар. Бала жасанды зерттеуде қоршаған ортаны жақсы тани алады. Зерттеу жұмысы мектепке дейінгі шақта басталуы маңызды. Сол уақытта бала айналаны тануға құштар болып келеді және өзінен үлкендерге «Бұл не?», «Ол қалай?», «Неге бұлай?» дегендей көптеген сұрақтар қояды. Сол себепті, баланы ерте жастан үнемі қызығушылық танытуға үйрету керек.
Мектеп жасына дейінгі балалардың зерттеушілік әрекетін дамытудың тиімді құралдарын іздеу теориялық және практикалық шешімдерді қажет ететін өзекті мәселе саналады. Мектеп жасына дейінгі балалардың танымдық әрекетін дамытудың мүмкін құралдарының ішінде ғылыми-зерттеу қызметі ерекше назар аударуға лайық. Зерттеу әрекеті барысында балалар дүниенің құрылымын танып-біледі. Ғылыми-зерттеу жұмыстары – ізденіс пен зерттеуге негізделген интеллектуалдық және шығармашылық әрекеттің ерекше түрі. Сондай-ақ, ол заттардың құрылымын, қоршаған дүние құбылыстары арасындағы байланысты түсінуге, ретке келтіруге және жүйелеуге бағытталған.
Іздену әрекеті неғұрлым жан-жақты және қарқынды болса, бала соғұрлым жаңа ақпарат алады, тезірек әрі толық дамиды. Тапсырма неғұрлым қызықты болса, бала оны орындауға соғұрлым белсенді қатысады. Бұл жағдайда зерттеу және іздеу жұмыстары үлкен маңызға ие. Бала бір нәрсені естіп, көріп, өзі істегенде білім берік және ұзақ уақыт бойы игеріледі. Табиғаты бойынша балалар зерттеуші, олар қоршаған әлемді қуанышпен және таңданыспен ашады. Олар бәріне қызығушылық танытады. Дүние балаға оның жеке сезімдері, әрекеттері және тәжірибесі арқылы ашылады.

Балжан СЕЙЛОВА,
№51 бөбекжайдың тәрбиешісі,
Қостанай қаласы