Қыстың көзі қырауда

Қыс мезгілі кіршіксіз аппақ қарымен, қаһарлы мінезімен, сықырлаған аязымен ерекше. «Қыстың көзі қырауда» деген халқымыздың тамаша сөзі осы бір мезгілді айна-қатесіз баяндап тұрғандай.

Абай атамыздың: «Ақ киімді, денелі, ақ сақалды…», – деп келетін өлең жолдары да қыстың басқа жыл мезгілдерінен ерекшелігін паш етеді. Қыс мезгілі өзінің сәнімен ерекше. Желтоқсан ызғарлы желімен, қаңтар қаhарлы аязымен, ақпан боранымен келіп, жер бетін аппақ бір мамыққа орағандай.

Біздің «Алпамыс» балабақшасының табалдырығын алғаш аттап келген «Ертөстік» кіші тобының бүлдіршіндері мезгілдің қызығына малыну үшін серуенге шығып, даланың таза ауасын, қар жамылған ағаштарын, құстардың тоңып, ұяларына ұшып-қонып жүрегенін, қар бетіне өз аяқ іздерін қалдырып, мәз-мәйрам болып, көңілдері көтеріңкі күйде оралды. Балабақшамыздың басқа да бүлдіршіндері серуенге шығып:

«Әуес көріп жүгірген жас балалар.

Беті-қолы домбығып, үсік шалды»,  – дегендей, қыстың қызығына тоймай, аппақ қардан аққала жасады. Балалардың асыға күтетін мерекесі де осы қыс мезгілінде емес пе? Балалар алғаш рет балабақшада Жаңа жылды атап өтті: балабақшаға келіп, аяз ата мен ақшақардан сыйлықтарын алып, қуана білді. Осындай естен кетпес оқиғаларға толы қыс мезгілін керемет деуге толық негіз бар. Қыстың ғажайып ұмытылмас шақтары адам жанына шуағын шашып, нұрын төге түскендей.

Махаббат АБДИБЕКОВА,
«Алпамыс» б/б тәрбиешісі,
Арқалық қаласы