Тәрбие негізі – ұлттық құндылықта

Қарқынды дамып келе жатқан заманауи әлем қиындықтары мен қауіп-қатерлерімен мектеп жасына дейінгі балалардың санасына әлеуметтік желілер, телебағдарламалар және ересектермен қарым-қатынас арқылы әсер етеді.
Тәрбиешілердің айтуынша, бос уақытын ұялы телефон немесе компьютерде өткізетін 4-6 жас аралығындағы балалардың саны жыл санап артып келеді. Көптеген балалар зорлық-зомбылық элементтері бар ойындарды ойнап, ойын-сауық сипатындағы бағдарламаларға қызығады. Ал, моральдық қасиеттерді үйрететін мультфильм кейіпкерлерін жақсы көретін балалардың саны азайып барады.

Аталған мәселелердің пайда болуына интернеттегі ақпараттың шексіз қолжетімділігі, көретін бейнеконтентке бақылаудың жоқтығы және ата-аналардың жұмыс пен отбасы арасындағы теңгерімсіздік сияқты себептер әсер етуде. Сондықтан, бұны мұғалімдер мен ата-аналар бірлесіп шешуі керек. Осыған орай, ұлттық санасы қалыптасқан тұлға тәрбиелеу мәселесі өзекті болып отыр.

Қазақтың ақыны Мағжан Жұмабаевтың сөздері әр тәрбиешінің көкейінде: «Ұлттық тәрбие – ұлттың болашағы. Ұлт перзенті еліне, халқына қызмет ететіндіктен, тәрбиеші де баланы осы халықтың құндылықтарына тәрбиелеуі керек». Балабақшамыздың тәрбиешілері «Біртұтас тәрбие» бағдарламасы арқылы патриоттық, жауапкершілік, үлкенді құрметтеу, жақындарына сүйіспеншілік сияқты қасиеттерді қалыптастыруда. Мектеп жасына дейінгі балаларды тәрбиелеуде ең тиімді құрал – ойын әрекеті. Осы орайда, олардың жас ерекшеліктерін, қызығушылықтары мен қажеттіліктерін ескере отырып, ұлттық, спорттық және ашық ойындарды, мамандық бойынша балалар ойындарын, «Ана мен қыз» ойындарын қолданамыз.

Күй, бесік жыры мен балалар әндерін, жаңылтпаштарды, мақал-мәтелдерді, балалардың тілдік қарым-қатынасына қолайлы ертегілерді тыңдаудың ұлттық болмысты қалыптастыруда маңызы зор. Балалар қоғамдастығын қысқа мерзімді жобаларға, мақсатты серуендер мен экскурсияларға, эксперименттік іс-шараларға тарту – бала бойында ұлттық табиғи ресурстарға деген қамқорлықты қалыптастыруға көмектеседі.

Білім беру бағдарламасын жүзеге асырудың бастапқы кезеңінде біз «Қамқор», «Ұшқыр ой алаңы», «SMART BALA», «Шабыт», «Еңбегі адал – жас өрен», «Балалар кітапханасы» сияқты жобаларға балалар мен ересектердің қатысуына ықпал жасаймыз. Бұл білім беру бастамалары құндылықтарды сіңіруге, балабақшадағы волонтерлік іс-шараларға белсенді қатысуға, әртүрлі мамандықтарға қызығушылықты дамытуға, шығармашылық пен кітап оқуға деген қызығушылықты арттыруға көмектеседі.

Елена БРИТВИНА,
«Улыбка» б/б әдіскері,
Гульдана УРКУМБАЕВА,
қазақ тілі мұғалімі,
Лисаков қаласы