Асыл әжем, ғасыр әжем, аңсаған

Қазақ отбасындағы әженің орны ерекше әрі қадірлі. Осыған байланысты «Алтын бесік» бөбекжайында қазақ фольклорын тәрбиеленушілерге насихаттау мақсатында әже мен немереге арналған мерекелік іс-шара байқау түрінде өткізілген еді.

Тәлім-тәрбиенің бастауы, үлгі-өнеге көрсетер асыл жандар, қазыналы бұлақтың қайнар көзі саналатын әжелердің бала тәрбиелеуде алатын орны ерекше. Қазақ халқының әдет-ғұрпын, салт-дәстүрін балаларға түсіндіріп көрсетуге бағытталған бөбекжай-бақшамыздағы байқау 5 кезеңнен тұрды. Байқауға «Қарлығаш» тобының тәрбиеленушілері мен ақ жаулықты әжелері қатысты.

Байқау барысында әжелеріміз бесікке салу, тұсау кесу, қырқынан шығару, сырға салу, қыз ұзату сынды дәстүрлерді көрсетіп, оның тәрбиелік мәні мен маңыздылығын баяндап берді. Сонымен қатар, қазақ халқының ұлттық тағамдарын көрсетіп, балалармен қонақтарға дәм татқызып, жалпы қазақ халқының қонақжай екенін, дастарханның маңыздылығын өскелең ұрпаққа насихаттады.

«Жаңбырменен жер көгерер, батаменен ел көгерер» дегендей, сайыс соңында әжелеріміз бата беріп, балаларға жылы лебіздерін жеткізді. Біз де өз тарапымыздан әрбір әжеге алғысымызды білдіріп, «Алтын бесік» бөбекжайының басшысы Жанара Шалғымбекова әжелерді номинация бойынша мадақтамалармен марапаттады. Жас ұрпақты жастайынан тәрбиелеудің маңыздылығын қазақ халқы ерте түсінген, сол себепті әженің тәлім-тәрбиесін көріп өскен бала нағыз халық жанашыры болатыны сөзсіз!

Куляйша БАЛЕСОВА,
музыка жетекшісі,
Гульназия АМАНТАЕВА,
тәрбиеші, «Алтын бесік»
бөбекжай-бақшасы,
Заречный ауылы