Балабақша педагогі – болашақтың бастауы

«Ұстаз» деген ұлы есімнің жүгі қашанда ауыр әрі жауапты. Алайда, осы қасиетті жолдың ең алғашқы баспалдағында тұрған, кішкентай бүлдіршіндерді үлкен өмірге баптайтын балабақша педагогтерінің орны мен еңбегі ерекше.

Адам баласының тұлғалық негізі, оның болмысы мен мінез-құлқының іргетасы, сонымен қатар қоршаған ортаны тануға деген алғашқы көзқарасы дәл осы мектепке дейінгі кезеңде қаланады. Бұл шақ – адам ғұмырының ең маңызды көктемі болса, тәрбиеші – сол көктемде дән себетін бағбан іспетті. Сондықтан да «Ұстазым – ұлағатым» деген асыл ұғымның терең мағынасы, ең алдымен, баланың бойына ізгілік нәрін егіп, оған әлемнің әліппесін алғаш ашқан тәрбиешінің ерен еңбегіне арналуы тиіс.

Балабақша педагогі болу – бұл жай ғана мамандық емес, бұл – үлкен жауапкершілік пен шексіз мейірімді, болаттай төзімділікті талап ететін мәртебелі миссия. Тәрбиеші – баланың ата-анасынан кейінгі алғашқы тәлімгері, сырласы, ақылшысы әрі қорғаны. Ол әр сәбидің бойындағы жасырын жатқан қабілетті дер кезінде байқап, оны ұштауға, жақсы мен жаманды ажырата білуге, қоршаған ортаны сүюге үйретеді. Педагогтің әрбір айтқан сөзі, әрбір іс-қимылы мен көзқарасы бүлдіршін үшін өмірлік үлгі болып табылады. Сол себепті де тәрбиешінің бойында сабырлылық пен балаға деген шынайы махаббат қатар өрілуі шарт.
Қазіргі қарқынды дамыған заманда балабақша педагогтеріне жүктелер жауапкершілік жүгі де еселене түсті. Енді тәрбиеші – жай ғана бақылаушы емес, ол бала жанын ұғатын білікті психолог, ізденімпаз зерттеуші әрі инновациялық технологияларды еркін меңгерген жаңашыл маман болуы тиіс. Ойын арқылы оқытудың озық әдістемелерін барынша ұтымды қолданып, бүлдіршіндердің даралығын сақтау және жеке тұлғалық қасиеттерін құрметтеу – тәрбие ісінің алтын қағидасына айналды. «Ұяда не көрсең, ұшқанда соны ілерсің» демекші, ертеңгі күні ел тізгінін ұстар саналы азаматтың болмысы алғашқы ұстаздарының берген ұлағаты мен жүрегінен төгілген жылуынан бастау алады.
Педагог еңбегінің ең биік шыңы мен шынайы жемісі – қияға қанат қаққан шәкіртінің алғысы мен риза болған ата-ананың сенімі. Бүлдіршіннің тілі шығып, алғашқы тақпағын шырқағанда, қолына қалам алып, әлемнің суретін салғанда не қоғамдық ортада әдептілік танытқан сәтте тәрбиешінің маңдай тері ақталып, еңбегі жанғандай күйде болады. Бұл мамандық иелері күн сайын өздерінің рухани байлығы мен мейірім шуағын балаларға арнай отырып, іс жүзінде бүкіл қоғамның берік іргетасын қалап келеді.
Түйіндей келе, балабақша педагогі – бала жанының нәзік бағбаны. Олардың аялы алақанынан жылу тауып, мейірім шуағына шомылған әрбір бүлдіршін – ертеңгі күннің жарқын тұлғасы әрі мемлекетіміздің берік тірегі. Өз ісіне шексіз адал, әр шәкіртінің жетістігін өз биігіндей көріп қуанатын барша мектепке дейінгі ұйым қызметкерлерінің қажырлы еңбегі – шынайы құрмет пен тағзымға лайық. Ұлағатты ұстаздан тәлім алған бүлдіршіннің болашаққа бастар жолы әрдайым ашық, бағыты айқын болмақ.

Вера АБИТОВА,
№40 бөбекжай меңгерушісі,
Гульдана СУЙЕУБАЕВА,
бөбекжай әдіскері,
Қостанай қаласы