«Бүлдіршін аруы-2023»

Халықаралық балаларды қорғау күніне орай «Алпамыс» бөбекжайында мақала тақырыбымен аттас сайыс өткізілді. Оған әр топтан 2 бүлдіршінен қатысып, өнерлерін көрсетті. Сайысты кіші топ тәрбиешілері Зәуре Муканова, Тамаша Адилова ұйымдастырды.

Бүлдіршіндер сайыста «Сәлем сөздің анасы», «Шебер қолдар», «Өнерлі өрге жүзер» және сән үлгісін көрсететін жалпы 4 кезең бойынша бақ сынасты. Бірінші «Сәлем сөздің анасы» кезеңінде кішентай ханшайымдарымыз өздерінің ата тегімен таныстырды. Екінші «Шебер қолдар» кезеңінде сайыскерлер мойыншақ тізумен сынға түссе, «Өнерлі өрге жүзеді» сайысында ару қыздарымыз ән айтып, би билеп – өнерлерін көрсетті. Ерекше қуаныш силайтын мезгілдегі сайыстың соңғы кезеңінде бүлдіршіндер түрлі материалдан жасалған киімдерін киіп, ерекше сән үлгісін көрсетті. Әр айналым сайын қатысушылардың өнерлері бағаланып отырды.

Нәтижесінде қазылар алқасының ұйғаруымен балғын балалық шақ «Бүлдіршін аруы-2023» сайысына қатысып, өнерімен көзге түсіп, бесенділік танытқаны үшін «Ертөре» мектепалды даярлық тобының тәрбиеленушісі Ясмин Кәкім «Бүлдіршін аруы-2023» атанып, бас жүлдеге ие болса, Аяулым Төлентай І орынға лайық деп танылды. Сондай-ақ «Ербатыр» мен «Ерқанат» тобының тәрбиеленушісі Сезім Хамидолла, Айша Жанапсанова ІІ орынды қанжығасына байлады. Ал Азима Нурманова мен Жанбота Абдығалым ІІІ орындыға ие болып, бағалы сыйлықтар мен дипломдарға ие болды.

Гаухар ШАЛДЫБАЙ,
«Алпамыс» б/б «Ертөре»
мектепалды даярлық
тобының тәрбиешісі,
Арқалық қаласы