«Қарлығаш» балабақшасына 10 жыл!

Әулиекөл ауданына қарасты Құсмұрын кентінде 2011 жылы желтоқсанның 1-інде «Қарлығаш» балабақшасы балғындарға есігін ашты. Биыл киелі ордамызға 10 жыл. Ұйымшыл ұжым ұрпақтың тәрбиелі болып өсуі жолында қызмет етіп келеді.

«Бала естігенін айтады, көргенін істейді» – деп қазақ халқы бекер айтпаған. Балабақша – баланың жүйелі түрде білім мен тәрбие алатын ең алғашқы қоғамдық ошағы. Келер ұрпақты еңбекке, өнер-білімге, елінің ар-намысын қорғауға және ізгі адамгершілік ниетке баулитыны да рас. Біздің тәрбие ошағында үш топ жұмыс істейді. Екеуі қазақ топтары болса, біреуі орыс тілінде. Балабақшада 22 жұмысшы қызметкер бар, оның 7-еуі педагог мамандар. Балабақша топтарында өз жұмысын жақсы білетін, бірінші, екінші санаттағы мамандар жұмыс істейді.

Ғұлама ұстаз әл-Фараби: «Білім берме, тәрбие бер», – деп айтқандай, «тәрбие – өмірдің өзекті мәселесі» екенін есімізге сала отырып, тәрбиеленушілеріміздің бойында еңбексүйгіштік, адамгершілік қасиеттерін дамытуға үлес қосып келеміз. Жұмыс істеп келе жатқан 10 жыл ішінде ұжым педагогтерінің жеткен жетістіктер жетерлік. Солардың ішінде аудандық, облыстық, республикалық деңгейдегі жүлделер, «Үздік тәрбиеші», Алғыс хат, мадақтама қағаздары мен авторлық жұмыстар бар. Балабақшамызда тәрбиеленушілерге арналған тәрбиелік жұмыстар, мерекелік шаралар, спорттық сайыстар, көріністер, байқаулар жиі ұйымдастырылып тұрады.

«Қарлығаш» балабақшасының ұжымы атынан тәрбиеленушілеріміздің ата-аналарын және балабақша қызметкерлерін 10 жылдық мерейтоймен құттықтаймын. Балабақша ұстаздарына нәтижеге бағытталған білім мен тәрбие беру жолында іскерліктерін дамытуын, шығармашылық табыс, отбасыларына бақ-береке тілеймін.

Айгүл САЛЬМЕНОВА,
«Қарлығаш» б/б әдіскері,
Әулиекөл ауданы