Жыл құстарына қамқорлық

Құстар үшін қыс мезгілі қиын кезең, әсіресе биылғыдай қар көп болса. Соған орай, №28 мектеп-гимназиясының бастауыш сынып оқушылары арасында «Құстарды қыста тамақтандырыңыз» жобасы өткізілді.

Аш құс суықтан қатты зардап шегеді. Құстарға қыста қолдау көрсету аса қажет-ақ, олар үшін азық дайындап, тамақтандыруды ұмытпаған жөн. Балалардың бойында мейірімділік, қайырымдылық сынды адами қасиеттерді қалыптастыруды көздеген шараға олар белсене ат салысты. Қыстайтын құстарды азықтандыруды ұйымдастыруға және өткізуге балалар ата-аналармен бірге азық дайындап, жем жинады және «құс мәзірін» әзірледі.

Ата-аналар мен балалар аса маңызды әрі қажетті іске жауапкершілікпен қарады. Жобаны өткізу барысында түрлі материалдардан құстарға арнайы ұя дайындалды. Табиғатта өткізілген уақыт олар үшін кішігірім мерекедей болды: балалар құстарды тамақтандырды, бірлесе өлең айтты және құстар туралы жұмбақтар шешті. Одан бөлек, күн сайын дәндер мен тұқым пакеттерімен келіп, оларды тамақтандыруға деген құлшыныстары артты. Тіпті көршілес ғимараттардың маңында құрылған ұялардың ішіне де құстарға азық қалдырды.

Артынша көркем шығармашылықпен айналысу барысында құстардың суретін салып, ұсақ-түйек жұмыстар мен аппликациялар жасады. Жобаны іске асыру барысында табиғатта сауатты мінез-құлық дағдылары мен іскерліктері, қоршаған ортаға қызығушылық қалыптасады. Сондай-ақ, тәрбиелік мәні зор шара балалардың шығармашылық қабілеттері мен қиялдарын дамытады.

Әдия ТЕМІРБАЕВА,
№28 мектеп-гимназиясы
бастауыш сынып мұғалімі,
Қостанай қаласы